( قصص وحكــاوى ) ـ بقلم الشاعرة / هناء رضوان

قصص وحكــاوى

قصص وحكاوى فى قاعدة على القهاوى
فلان ده اتجوز وابنه لسه للدنيا جاى
وده ابنه فاشل خرج وقال خلاص مش جاى
طب وانا مالى
فلان ده خالى وده بيحب وده شاطر اصله راح طب
وده كان مسافر وده ابنه مهاجر وده غنى اصله شغال تاجر
طب وانا مالى
وده دكتور الناس واقفة عليه بالدور اصله ناجح ومشهور
وده بيبنى عمارة وده طالع اعارة
طب وانا مالى
أبوه كان راجل فقير لكن بجهده وتعبه اتعلم وبقى سفير
وده كان شغال غفير وفجأة بقى وزير بيقولوا
اشترى كام شهادة على كام تقرير
طب وانا مالى
دى عيلة دايما متفقة ودى على الميراث متخانقة ودى ع طول متفارقة
طب وانا مالى
كان بينهم حب واتفاق فجأة طلاق بيقولوا مفيش وفاق
ودى فاتها قطر الجواز وبقيت فى وحده ووسواس
اصلها كانت دايما بتتعالى على الناس
ودى مشيها بطال شوفتها واقفة مرة لوحدها مع البقال
طب وانا مالى
وبعد كده يقولوا انسان طيب بيعانى من البطالة
اصلهم مش عايزين عمالة وبيسلى نفسه
بشوية حكاوى فى قاعدة على القهاوى
يا اللى انت شاغل نفسك بحالى
خليك فى حالك وسيبنى فى حالى
........................
يَا أَيُّهَا الَّذِينَ آَمَنُوا اجْتَنِبُوا كَثِيرًا مِنَ الظَّنِّ إِنَّ بَعْضَ الظَّنِّ إِثْمٌ وَلَا تَجَسَّسُوا وَلَا يَغْتَبْ بَعْضُكُمْ بَعْضًا أَيُحِبُّ أَحَدُكُمْ أَنْ يَأْكُلَ لَحْمَ أَخِيهِ مَيْتًا فَكَرِهْتُمُوهُ وَاتَّقُوا اللَّهَ إِنَّ اللَّهَ تَوَّابٌ رَحِيمٌ
......................
 

هناء رضوان