بتحبها ؟
وعارف إنها دايبه فى دباديبك
نفسك تكون أبو إبنها
وخايف إنها فجأه كدا تسيبك
قوم روح لغاية عندها
قوم روح اوام
وإطلب سماحها و ودها
إوعى تنام
قبل اما تضمن إنها
ليك بس .. حجزت قلبها
روح قولها
ماتبعديش عن دنيتى
إنتى اللى باحلم اكون لها
إتتى نعيمى وجنتى
إنتى الحقايق كلها
إنتى حياتى وآخرتى
روح قولها ماتخافش
الخوف مش هايفيدك
الخوف ده كان اسوء كلابش
كلبشت بيه إيدك
الخوف مش هايفيدك
مش هايواسى تنهيدك
مش هايخف من آهاتك
لاء بالعكس .. هايزيدك
الخوف مش هايفيدك
روح قولها
إن إنت راجع من جديد
عندك إراده
عزمك شديد
وعشانها هاتكسر حيطان
راجع بقوه من حديد
تعرف يا صاحبى
هى لسه واقفه ف الشباك هناك
دمعتها ع الخدين
اكيد مستنياك
عماله تحلم إنها عايشه معاك
حتى النفس تتنفسه كان من هواك
مش عايزه غيرك ليها ملك
هاتلاقى فين غيرها ملاك
دور فى قلبك
هاتلاقيها مشكلاك
تقسيمة الكفين عينيها والخدين
ف عينيك خيالها اهه هناك
حتى الكلام .. نفس الكلام
لسه بتعشقها و ف صوتها صداك
لسه بتسمع قلبها .. بتحس دايما نبضها
فاكر تماما شكلها .. نفسك تفضفض يوم لها .. روح قولها .. إنت إنتى ملكة دنيتى
إنتى اللى ليا فى عز جرحى ومحنتى
إنتى نصيبى .. أيوه إنتى قسمتى
بتحبها ؟
روح قولها
الشاعر /
محمد حسين الزين
ليست هناك تعليقات:
إرسال تعليق