وقبل ما أنام
بحب افتح كتاب نفسي
واسامح حد ضايقني
واشكر حد ساعدني
وطوِّل باله حبه عشان
يسمع مني ويحاول يفرَّحني
بحب كمان قبل ما أنام
امضمض روحي واتوضي
بوِرد بَحبُّه م القرآن
ومش عارف هنام واصحي
ولا هتبقى آخر مرة فيها هنام
ومش فارقة كتير اصلًا
لإني بدعي ربي اكون
ضلي خفيف على الدنيا
وقبل ما أنام
بخاف جدا اشوف الحلم
-لإني عمري ما شوفته-
ومش عارف سبب دا ايه؟
ولو مرة يجيني حلم
هيبقى إزاي؟
ومين هيزرني ف منامي؟
ولو هبقى كتير محظوظ
يجيني حبيبي ف منامي
وأخده ف حضني وأضمُّه
وأبوس إيده واتملَّي ف نور عينه
وأطلب منه يسامحني
ويشفعلي شفاعة لحد يوم الدين
يا رب ارزقني حلم معاه
قبل ما أنام
بحب أتشاهد على روحي
عشان لو كان حياتي خلاص
أحب إني الكلام يخلص
بذكر الله
وقبل ما أنام
بسأل نفسي- بعد كلام-
صحيح الدنيا مستهلة؟
نِبات والحقد مالينا!
نِبات والكُره مالينا!
نِبات و حد منا يكون زعلان!
قبل ما أنام
ليست هناك تعليقات:
إرسال تعليق