.. بلاش تسألنى عن نفسى و حاول انت تقرانى...
بلاش تسألنى عن نفسى .........
و لا تحاول تغوص فيا.....
لأنى صفحة مخفيه.......
باسطر فيها احلامى و اشواقى و احزانى
و ساعات باكتبها من تانى
او امسح سطر مش واضح و اضيف له جملة عجبانى
.. بلاش تسألنى عن نفسى و حاول انت تقرانى...
انا الكلمة اللى جوايا و زى ما هى بانطقها
لا عايزك يوم تكدبها و لا نفسى يوم تصدقها
و لو الصفحة مش عجباك بدون ما تقولى .... احرقها
بلاش تسألنى عن نفسى عشان ما تتوهش جوايا
و تمشى فى الدروب مسافات......
و تتشنكل فى زوايايا
و يمكن تتعدى منى و تبقى لغز مش مقرى
و يحكوا حكاية فى غموضك و افكارك و تفانينك .........
و يرموا الشوك على سنينك............
و هيطالبوك تقوم تجرى
بلاش تسألنى عن نفسى وشوفنى زى ما تشوفنى
تقول عاقله تقول مجنونه ............
مسيرك بكره تعرفنى
و لو مرة لقتنى غريبه............
سيبك منى و شوف حالك
و لو عاجباك ... يا ميت اهلا ...
هتبقالى و هابقالك
هاسيب لك حتة جوايا على ادك تكون ف امان
و اقولك هى دى نفسى ...
يدوب حتة من الإنسان
ليست هناك تعليقات:
إرسال تعليق