لو ببنسى \ الشاعر وحيد راغب

لو ببنسى
مش هاننسى يوم لقاكم
كان له نكهة زى صبح
بينولد ويا رؤاكم
كان زهوره
تنعش القلب اللى حاير
فى رضاكم
ساعة تشبه الدهر الطويل
ما ينشبعش
من حديثكم
أو جمالكم
أو هناكم
هو وجه الشمس يشبع
قلب أرض ماليها شوق
هو ياسمين المحبة
للى عاشق
منه يوم
راح يفوق
مش هاننسى نظرة منك
تحكى انك
كنت عايزة منى قلبى
بس قلبى خاف عليكى
ورجعك عش الأمان
لو خلقنى الرب ذاتى
كان ف قلبى الحب هان
من زمان
كان وعد بينى وبين فؤادى
انجرح والغير يعيش
احتوى دمع اللى باكى
والتمس له أكل عيش
يبقى باصص بانشراح
للدنيا فيه
يبقى حابب للحياة
والنسكفيه
ساب وراه الحزن يبكى
انه مش قادر عليه
يبقى وجهه نور بينضح
والخدود رمان بيطرح
بالحيا والشوق مليه
مش هاننسى حرف قلته
يسعدك زى النسيم
وانى سابح جوا منك
أفردك قدام عنيكى
كالنجوم
تغضبى وارشف صراخك
تهدئى والقلب يصفى
كالربيع
واللى فات برهة وعدت
واللى جاى بيكون لبكرة
مش رجوع
وان فيه فى الناس تملى
ناس بتعرف ربها
تعرف توجه كل دفة
لدربها
عمرها للنور بتسعى
دون جزاء أو شكر بادى
جوا منها قلب رابعة وابن فارض
مش تيك أوى
فى الحب عارض
أو لديها نهج سادى
مش هاننسى إنى دبلت القساوة
ف روح محبة
واللى تاهوا ف ردها طقم الأطبة
وانى فتحت الثغور للنتح يعمل
بعد ما سده الوجع
واللى واجع بالمواجع
وانى مزقت الهالوك
واللى سابه من فواجع
كات نيران للحضن فاتحة
للنهاية
فانطفت بحديث ملايكى
للبداية
مش هاننسى
بس أملى تكونى فاكرة
إنى كنت ف يوم لقلبك
أحلى ذكرى
الشاعر وحيد راغب عضو اتحاد كتاب مصر