(ليه جليدك مش بيدوب)
ليه جليدك مش بيدوب
باشتكى لك
وانت ميلك ألف ميل
كل نجمة وليها ديل
الا انت نور وبس
كان بودى القلب منك
بيه حس
إنى واقف فوق سفينتك
من زمان
كان بودى تكون أمان
والشطوط جيالى تجرى
زى فجر بشق ليل
والصوارى زى غنوة
هدهدت موج انطلق
زى السبق
بين الخيول
ليه جليدك مش بدوب
هو ثقب حبى
مش أوزون
هو أنا ما اقدرش اجيب لك
حتة زرقا م السما
عقد طارح ألف وردة
والادين
أساروها نرجس
أو نجوم
هو أنا طوقت وسطى
بألف ضحكة
زى نسمة
من جمالها لو بنغرق
ننطلق ونقوم نعوم
كنت شايفك
من ورا تبة خيالى
أفراس بترمح ف الخليل
صرواته هايجة بين سطور
الخوف لبكرة ..والجليل
هجره الملامح
مين يعدى من مضيق
زى إبرة والجمل
والمحتمل إمتى نحقق
جوانا منه بدون خجل
حبة وجود من غير مذابح
دمشق أنت
والأنين ملغوم بصدرى
ومعاوية ببكى مسجده
ف السليمانية
والنجف
قلبى انشغف
من كتر عقل بينجرف
من سيل معد
وبيوت نخاسة نبتت
ف الكوبانية
مع إنى دوما باعترف
إن التاريخ ما باعيدش نفسه
والحقانية
ميزانها خف
باشتكى لك
والمدى بينى وبينك
زى مركز جوا دايرة
والمماس
والخيال عمال بيرمح
ف الجناس
خلى قولك يبقى غصن
وعش ليه
لما موجة البرد تطحن
ف الضحية
ولما أفعى الخوف بنابها
تقوم تدور ف العشية
اشتغالك
صحى بالك باحتراق العشب فيك
وان نيلك
ضج منك لما سبته يشتهيك
وانت طارد مش بتجذب
لو عرفت الطهو تطبخ
والمطابخ فيها ياما
من عدن حتى تهامه
شئون وطقس ضباب وليل
والمستحيل
خيم عمامته فوق رؤسنا
بدون دليل
خلى سيفك من خشب
وارعى اغنام الجبال
زى بعض من الصحابة
لماغاب عنهم اجابة
للسؤال
لما قلبك ويا عينك
غايبة عنهم كل يافته للطريق
والصديق ملهوش معالم
تبقى سالم
باشتكى لك
صوت فى نفسى ملوش خروج
والبروج تهدى اللى بحر
واللى سطر ألف حرف
النجف فى السقف زينة
واللا ظرف
الخمايل للبلابل
والبلابل للخمايل
واللى سايل فينا نوحنا
أو جروحنا
واحنا قطعنا الحبال
بين ماضينا واللى جاى
مفيش دراسة أو خطط
كله قطط
بتموء وبس
الشاعر وحيد راغب عضو اتحاد كتاب مصر
ليست هناك تعليقات:
إرسال تعليق