((كل سنه وانت حبيبتى وناسك طيبين))بقلم ا//بكري جابر

من أحدث ما كتب الولد الطيب بالأمس مقطع من ( رمضان كريم )
كل سنة وانتِ حبيبتي وناسك طيبين
***************
رمضان كريم
ر مضان بخور
و حواري نور
وناس بتفرش قلبها ف قلب الميدان
وتعيد زمان الطيبين
فوق الإيدين
حبات عنينا بتنفرد فوق الوشوش عناقيد فرح
لابسين هدوم المرحمه و شال السماح
يا مؤمنه
لسه العيال جوه الجحور بتتسحر وجع
عايشه بتفطر ع الأنين
جوه المقام ف السيده
نرفع إيدينا بالأدان و نقول مدد
يا ام الغلابة الشقيانين
رمضان كريم
وانتِ اللي كان طبعك كرم
إملي الإيدين
قبل الخشاف والتمرهندي والعصير
و تعالي يلا و افطري
صحيح فطاري مش قوي
لكن نضيف
ربي يخلي المحسنين
كرتونه مليانه بأنين
قلبي إنكسر
بس العيال .....!!
و انا اللي كنت زارع ف الخلا عشقك سنابل للحبايب و الغريب
لكني ب احصد ف الشجن
ماشي ب اسحر ف النهار
مليش صدى
صبي بقى كل الوضوء على جتتي
وانوي الصلا
ناوي التهجد يا حبيبتي و مستحي
لاحسن يقولوا ازاي صلاتي تتقبل
وانتِ اللي ريحتك ف الهدوم
و انتي البخور والبسلمه
ب ابوس شفايفك ف السواك قبل السجود
يمكن صلاتي تتقبل
او مره أزور عرش الإله
فيكون غرامي شئ مقدس مش هزار
والعشق يبقى ميت رسول

بقلم ا//بكرى جابر