( الضحكة راح تنفرد ) ـ بقلم الشاعر / وحيد راغب

الضحكة راح تنفرد

الضحكة راح تنفرد
الكوبس علق
والكهربا ما بتنقطعش
والوش فلق

والضحكة ما بتنزرعش
لازم نشوف الخلل
من فين بييجى هواه
نكسر ضهور الملل
ويعينا عليه الله
أصل البلد
محتاجة منا السند
ما نقولشى ف كل سهلة الأف
أو من غير وجع يا آه
هو احنا ريشنا طلع
عشان نقول هانطير
أصل السبق بصاروخ
وما زلنا ف الحنتور
قدامنا وقت وجهد
نحس فيه بالسعد
نبنى العقول من دهب
والقلب من بلاتين
ونحب تراب البلد
من التمد الحجر
لحد قول : شلاتين
الضحكة راح تنفرد
تغطى كل الكون
ما دمنا فينا اتولد
الحب بالكمون
والقشطة من دمنا
ويا العسل حنون
لا تنسى إنك ولد
من مينا لفن شاهين
ملفوف بحب البشر
مع إنهم كارهين
تفوح بنور الوصال
والوصل أصل ودين
هيباشيا مين زيها
فى العلم والتكوين
قامت عليها قيامة
الجهل والتزيين
لا يمكن يكون الدين
للعلم ضد وقتل
السلطة ويا المال
ملهمشى دايما عقل
ــــــــــــــــ
التمد الحجر : قرية الشاعر بالدقهلية
هيباشيا : فيلسوفة رياضية قتلها تمزيقا كهنة الكنيسة باسم الدين
شاهين : المخرج السينمائى الكبير ولا ينسى فيلمه المصير عن ابن رشد
مينا : موحد القطرين
حنون : رغيف بالسكر والقشدة
شلاتين وحلايب قريتين مصريتين على الحدود السودانية
الكوبس : مفتاح الكهربا

الشاعر / وحيد راغب 

عضو اتحاد كتاب مصر