* العرقســـوس * - بقلم الشاعر / أ بــــو عـــمـــــــــا ر ا لــمـــصـــــــر ى

* العرقســـوس * 
  ........  
كنت باحبك أوى يا أمير
يا عرقسوس
شفا وخمـيـــــر
كنت ف حر الصيف بترطب
وتطرى ع القلب الناشف
لما الكل اتعلم يشرب
دم ولادنا ..
حقنا ...خايف
حوارينا مشغية بسوس
شفا وخمير يا عرقسوس
غامق لونك
لون أيامنا
فين لما بتخمر
أحلامنا
تفور ..وتثور
تملا وريدنا مع شراييننا
حلم النايم
حلم العاصى
بلدنا الحلوة
حارتنا الحلوة
قلب كبير
هم الظلم عليها يدوس
فى الفجرية
الشيخ محمود
بيخبط على كل ابوابنا
إصحى يا شحتة
إصحى يا عربى
دة التوب ...عربى
والنبى ..عربى
يلعن أبو ميت خاش الغربى
يلا الفجر دة قرب يطلع
واللى شطانه غزل له كابوس
سمـَّى وقام
ونسلم على بعض نبوس
وف رمضان عبودة سحرنا
وف تجاويف الحارة ..سهرنا
ليلة العيد ..
بيغنى قمرنا
حلوة يا أرض النور
يا بلادى
صلاة العيد
عم سعيد
جلاليب شكل لبن جاموستنا
شمساية أصلى
جات وباستنا
فى الشتا لمتنا ودفتنا
راكية نار على راس الغيط
فار الشاى من فوران غيظنا
من أيام ولا عهد مجوس
شفا وخمير
يا عرقسوس
يا مفكرنى بستى وجدى
عمرى ما دقتك
مرة لوحدى
عمرى ما كلت اللقمة لوحدى
كنا ف لمة
كل حارتنا .كانت أمة
حنفيتها ..النيل الصافى
نظرة ..
من عين المتعافى
شجرتها .. بالخير طراحة
ضلتها ..
كات أجمل واحة
قلبى عليكى
يا حارة مريضة
شيخ الحارة ..صبح ملبوس
إبنى ما يعرف عنك حاجة
جه دنيته ولقاها ..حوااجة
غير من طاطا
يلهو ايامه بزر بطاطا
أحيانا . حتة شيكولاتة
راحت منك
يا عرقسوس
ولا شاف مرة
رن صاجاتك
ولا لف كعابك فى حاراتك
مهمن طالت بيك حكاياتك
إلا الأصل اياك تنساه
حارة بلون عمك محروس
صوته يجلجل
كل مغـارب
شفا وخمير
يا عرقسوس
......................
بــــقـــلـــــــم / أ بــــو عـــمـــــــــا ر ا لــمـــصـــــــر ى