احمد صبري \ كملي

احمد صبري

كملي
-احمد صبري
-
كملي
دوسي من غير ما تحسي
على النفس اللي باقي
و إنسي
إنك بيا هتعذي
و بدعي
وكان في نفسي
بس اتحرقت اوراقي
ايوه اندفنت اشواقي
هزمني ياْسي

ماقدرتش احقق احلامك
واجيلك ومعايا الحصان
ماقدرتش اوصل ايامك
ماكبرتش على الاحزان
ماعرفتش اجي واخطفك
وبشق روحي بيدي
ضعفت ومش هستضعفك
و كنت اتمنى ترضي
كملي
والود ودي
اترسمت احلام كتير
على رملي
فرشت وردي
لونته بالتباشير
شوية مية معدية
خلعتني من جزوري
احسن لي اكمل وحديا
اديني عرفت دوري
ودوري يا سنين الحلم
اجمل حلم ليه بيموت
داخل مهرجان والفيلم
صورة بس من غير صوت
كملي
ماتسيبيش نفسك ف وهمك
كمان ماتنسيش تدعي لي
ماتشيليش همي و همك
و ماتحاوليش ترجعيلي
انا ليلي ماهوش ستار
وفاضح كل اسراري
عشقك بقى زي النار
حرق قلبي و افكاري
بقيت واحد ماعندوش عقل
وقلبه كان عشانك نبض
روح بس من غير شكل
صرخة بس تحت الارض
كملي
مع نفسك
و يا نفسي يلا إستسلمي
خلي بالك من نفسك
إوعاكي زيي
تعملي
كملي