** دايرة مقفولة **
يا راضى تبقى متغمى
و متحمى بجردل كذب و غناوى
عشان ناوى
و عشان غاوى
تكون مضحوك عليك على طول
و تتملا الكلام عادى
تقوم بادى
و واقف كيف ما قالو تقول
يقولو لك خلاص هانت
تقول بانت
برغم انك ما بتشوفشى
يقولو البحر مات موجه
تقوم نازل برغم انك ما بتعومشى
يغنو تبقى فى الكورس
حفيد حورس
و صوتك يعلا و يجلجل
كأنك يا البعيد خايف
عشان هايف
تبص فى مرة على حالك
و سايب ضحكتك تتدبل
و تتبدل
عشان سجنك بقى سؤالك
و مهما سنينك اتعدت
او اتمدت
طريقك دايرة مقفولة
و اخرها مفيش
عشان راضى بولا حاجة
و بسذاجة
فاكر نفسك كدا هتعيش
فهمى على
ليست هناك تعليقات:
إرسال تعليق