( ومضات )
سامح ايليا
وفوق الشوك وانا حافى ،،، مشونى
ابص لفوق اشوف الجفا ،،، بعيونى
احس وادوق طعم الوفا ،،، بظنونى
الاقى الروح تيجى وتروح ، ويلومونى
يا لايمين العاشقين ، على ايه تلوموهم
دا العشق مرار ، وحلم العشاق ، تواسوهم
---------------------------------------------
احب الناس ، وضحكتهم
واكره ماعليه ، دمعتهم
ولو لفيت فى كل الكون
عمرى ما هشوف ،،، دنيتهم
---------------------------------------------
باصور بعينى افكارى
وجوه قلبى اسرارى
وفين ما اروح
ومهما ابوح
خيالى ما يعرفه ،،، جارى
---------------------------------------------
وياما فى الجبل حاجات مخفيه
زى ما فى البحور كنوز اثريه
وبرضه كام من قلوب مليانه حنيه
وفيه كمان ناس بالقليل مرضيه
لكن للأسف اكتر البشر الغنيه
بياكلوا لحوم بعضهم ،،، نيه
-------------------------------------------
الناس بيبكوا بعضهم عند القبور
ووقتها بيكون الندم مالى الصدور
ويفتكروا ساعتها الحنان والرحمه
ويفتكروا كمان الضلام والنور
وبعد الرجوع يا ولداه تلاقى قلوبهم صخور
--------------------------------------------
هذه بعض ابياتى للذكرى ( سامح ايليا )
ليست هناك تعليقات:
إرسال تعليق