سفير الحرف ف جنودي
لا ساحر كنت ولا حاوي
ما انيش الخال ابنودي
ولا ذره ف قصيد هشام
حروف الجخ جذابه
وعايش حرفي ف الأوهام
وغَيَّرَتْ إيه ل كتابه؟
ياما دندن صلاحها جاهين
وغنى العندليب حرفه
وزاد الآه ف شعره آهين
وألم الكف من دُفُّه
انا مش نجم بيلالي
ورقصت قمره على قوله
ومال الشعر دا ومالي
دا جوه بيوته كتر هوله
أنا ما اعرفش ف الاشعار
وكل كلامي متلخبط
أمير الشعر كان قال عار
ف سوق الشعر بتخبط
وشوقي لو أنا شفته
لكنت اكون انا قلمه
واقوله الحرف كلفته
ياوطن الشعر رافع علمه
ياريتني اكون ف ديوانك
كلمة حق ع الجبروت
واقول للعدل مين هانك؟
ما انا عايش طبيعي ف الموت
لانك تهت ف طريقك
ميزان خشبي زاره سوسه
وراحت زهوه ف بريقك
وجالنا الظلم وكابوسه
وانا مش شاعر ياكل الناس
لسان الشعر مش أخرس
انا ينبوع من الإحساس
لكني ياريت بأتنفس
قتلت الحرف جوايا
بيحرضني على الإبداع
ياحتت القلب يابقايا
أنا إنسان لكن متباع
فقولوا للشعر لو تفهم
طريق الحلم هَدَّامه
ولو مُصِّر وهتحلم
ضنين لو عشت بسلامه
ليست هناك تعليقات:
إرسال تعليق