من قصيدة ( نفسي أبات غالب )
أبويا حفظني الدرس
اللي حفظهوله جِدي
وجِد جِدي
ومن بعده انا حفظته لابني
امشي جنب الحيط
إعمل نفسك عبيط
تكسب يا ولدي
إقفل بابك عليك
إقفل بؤك وإقفل عينيك
وطاطي للريح تعدي
ومهما تبات مظلوم
سامح وعَدي
يابا ...
يابا ولى زمانك
وناسوا خلاص خِلصوا
واللي انت شفته دهب
في زمنا بقى فلصو
ولا بيجيب ولا بيودي
يابا الكل بقى مادي
معايا المال هانور
وأصغر واكبر واقرر
والكل يطلبوا ودي
يابا نفذت الكلام
وربطت نفسي بمِيت حِزام
داسوا على خَدي
افتكروا علامة الرضا سكوتي
مسحوا إسمي وحللوا موتى
وقَطعوا وردي
يابا باعوني في أسواقهم
كما السلعة
سرقوا فرحتي مني
ورموني وسط نار والعة
والكل بقى ضدي
جابولي السم وشربته
وماتت فيا أحلامي
ومَوتوا ف قلبي طيبته
وكسروا ف أيامي
والكل خان عهدي
يابا نفسي ولو يوم أبات غالب
وأعيش تعلب في وسط التعالب
قبل ماينهشوا جلدي
يابا نِفسي ضحكتي ماتكنش
مرسومة من بره
وتنساني أحزاني
بس ولو مره
ومااخافش على ابني من بَعدي
نفسي يفوت عليا القمر
ليله متبسم
ويجيلي بُكره بضحكتهُ مستسلم
وجايب معاه سَعدي
يابا ياريت ما حفظتني
دا الدرس
ماتت أحاسيس الناس
ومش بيموت فيا الحِس
ولسه انا باقي على عهدي
بأدعي لك بالرحمة والغفران
علمتني إزاى أكون إنسان
والله يسامح جِدي
كلمات : أسامة رفعت
ليست هناك تعليقات:
إرسال تعليق