بـــيـــَّــا ع ا لــشــعــــــــر
()(*(*(*(*(*(*(*(*(*()
هابيع الشعر يا سادة
ويا سامعين ..ويا حابين
كلامى وشعرى بزيادة
فى بلدى الشعر
ما يأكلشى شاعر عيش
ولا حتى يلبس خيش
ما انا يومى
حاضن جوعى
وانام واصحى ..على دموعى
ورامى دماغى ..على كوعى
وهمى زيادة فى زيادة
وكالعادة
يا شعرا وأسياد السادة
حياتى عايشها بالبركة
وحتى المية
باشربها على لحمى
ولا مرة باحط
عليها م السكر
وباشربها كمان .. سادة
وماشى بشعرى
أ تـمـنظـــر ..و بأتــأ نـعــَـــر
إذن .. شعرى يا شعرائى
ما سَـدّ ف يوم وجع وجعى
دة ..زاد ألمى
وفضى كمان سنون قلمى
ويملا اوراقى ع الفاضى
يا قاضى الشعر ..يا قاضى
ما نيش نخاس ولا جخاخ
ومالى سطورى
آااااه ..........وصراخ
هابيع الشعر فى الأسواق
واقطع من حروفى ...حروف
هابيع وجعى ..مع الأشواق
وافضى الكلمة م المعنى
وافرغها ....واشـرَّحها
وأفرش بيها كل رصيف
هابيع الشعر للشعرا
بنص رغيف
هابيع الشعر ..واعمل منه دكانة
وافصل من تفاصيله
بقايا لنفس ...هلكانة
وارصه مشوى أو مسلوق
على السفرة
واقدم منه للبهوات
وانا عارف
ما هـَيمـِدُّوا فى يوم إيدهم
لباقى فـُتـــات
وفاتحين له حانات الشوق
على الصالونات
وعاملين منه ...ألبومات
هابيع الشعر بالحتة
والملم من قصاقيصه
وارقـَّغ جرحى فى الجتة
نخلد واحة للشـعــرا
ونرسم للحروف خارطة
تكون نبراس لجيلنا الجاى
ويبقى الشعر ..بالخرطة
واحطه ف قفة وابكى عليه
واشيل القفة على كتفى
دة انا واقـِف ...ومـِتكــَــفـّى
ولاجله ..شفت ميت حتفى
وانا قلبى ونبضى ... حروف
وكلمة شعر ...ضـَىّ الشوف
هابيع الشعر بالكيلة
ومين شـــــا رى ؟
فى حرفى .. هـَمــّى مـِـدَّارى
ما انا شاعر ...بلا حيلة
هابيع الشعر ..واتوصـَّى
يا ناس ..اقروا
طب ... اتـهـَجــُّوا
ـهييجى يوم وتفتكروا
أنا بيـَّاع وباتوصـَّـى
لناس ...من طبعها الخسة
هابيع الشعر من هـَمـِّى
ما انا شـــا يـِب
خلاص وبقيت فى سن امى
ما تفرق فصحى من عامى
تعالى ف حضنى .. يا حروفى
ودفـّـينى
دة عمرك ... عمرى بالساعة
يا ما تعبنا
يا ما شقينا
وبالكلمة ..ياما غنت سواقينا
وغنى البلبل الموجوع
وغرقت ميـّة الساقية
فى بحر دموع
أبيع نفسى
أبيع روحى
ما ابيعشى الشعر والكلمة
ولو حتى ..هاموت م الجـــوع
...................
بــقــلـــــــم ا لـــشــــــا عــــــــر
أ بـــــو عـــــمـــــــا ر ا لـــمـــصـــــــر ى
ليست هناك تعليقات:
إرسال تعليق