شاشة العاشقين
عاشق هواكي زي الندي
يسقي الفجر بكاس الرضا
يطلع نهاره بنسمة حنين
وتسكن هواكي لآخر مدي
.....
بحبك ف صورة رسمها الخيال
ولقاكي ياعمري شبيه المحال
ما بيني وبينك طريق وجبال
وكل الظروف علينا مستأسدة
........
صورة وبيني وما بينها كلام
حكاية ما بيننا ف دنيا الأحلام
ويفرج زمان الحنين بالأوهام
وتقول الدنيا ف لقانا مش متأكدة
......
حكاية ف شاشة ف زمن كداب
ونظرة حنينك عني ف غياب
وصورة ما بيننا تقول أحباب
ولسة الحياه ف لقانا مترددة
.......
ف حبك عشقت زماني اللي كان
وصاحبت خيالك في كل مكان
ومشيت في حبك طريق الجنان
يمكن يحن زماننا الحزين بالرضا
......
عاشقك حبيبتي زي طلة نهار
يفوتها الفجر الحزين بدمعة مرار
وتحلم ف يوم بضحكة تهد الجدار
تنده هوانا تنده لقانا نلبي الندا
.........
بحبك ياحلم صعب فيه الحقيقة
وعايش في وهم أشوفك دقيقة
لحم ودم في لحظة حب جريئة
وتقوللي شفايفك عشقي كده
.......
ويفضل هوايا شايفك ف السحاب
وطلة عيوني للسما عايشة العذاب
ودمعة بتسأل لامتي ياعمري الغياب
ولامتي هيفضل هواكي بالشكل ده
يمن بلال
ليست هناك تعليقات:
إرسال تعليق