* الوصايا *
لما اقول اني راضي ..
متصدقوش
معتش حاجه بتمر عادي ..
بتسيب على الوشوش .. نقوش
وايه هيفيد كلامي ..
ولفين يوصل صراخي ولا ندايا
اخره صندوق الاوامر والوصايا
من جد جدي بيوصوني بالقناعه
رضعوني بيها رضاعه
قالو اوعي تبص لغيرك
وارضى بالمقسوم كل وقت وكل ساعه
ده الرضا بالمقسوم عباده
وانا اهزلهم في راسي قال يعني فاهم
زرعو فيا الرضا .. صنعوه صناعه
منين بقى تيجي القناعه
بكلمتين
عمر الكلام ما يفيد واحنا بنشوف البشاعه
لما مقدرش اشتري كيلو لحمه
ويكون ركوبي محشور جوه زحمه
لما تبقى الفسحه مجرد إشاعه
وغيرنا يلبس .. وغيرنا ياكل في الملبس
اخر نطاعه
لما يعيش سته في أوضه
وغيرنا كل همه بس موضه
يبقى ازاي اصدق في البتاعه
اللي بتسموها قناعه
العدل فين
لما قولتو الكلمتين
وغيرنا برضه مش ليهم كلمتين
انه يداري النعمه عن المحرومين
ميقولش اخباره في الاذاعه
اصلهم مش ناقصين
لا .. ناقصين
ناقصين يحسو انهم بني أدميين
ناقصين كرامه
انا عاوز بس حقي
انا مش عايش عواله
ولا تقف الشكوى في حلقي
وأقول قواله
المساواه هي اللي تشفي التعب
عايزين عداله
قبل ما يجينا الوبا
خلونا نقوى المناعه
بقلم / حاتم سليمان
ليست هناك تعليقات:
إرسال تعليق