المسحراتي .. تغريدة بقلم المبدع / أحمد بيومي

المسحراتي

قالوا مصر عجزت ..
بتحب فيها إيه ..؟
قاعد فيها ليه ..؟
رديت بسرعه ..
إنتوا أتجننتوا أكيد ..
إنتوا بتقولوا إيه ..
دي مصر جنه ..
والأرض حنه وتمرحنه ..
طاب شموا ترابها ..
فيه ريحة ولادها ..
ريحة أبويا و وجدي وأخويا ..
ريحة محمد وعبد العظيم ..
ومينا .. ومرقص .. و عم حنا ..
وأنا مسحراتي صنعتي ..
أصحي الضماير .. أدور ليلاتي ..
من باب لباب ..
اصحي .. صبحي .. وأم سعاده ..
والحاج أحمد و عمتو توحه وعمو عبد الوهاب ..
ماشي أدقدق من بيت لبيت ..
ساعات الاقي زيطه وساعات سكوت ..
ومن زقاق لحاره ..
لعطفه لشارع .. وكمان لغيط ..
ماشي لوحدي والدنيا ضلمه ..
عمال أزقزق .. أقصر طريق ..
عمال أدقدق .. وسعات أغني بصوت غويط ..
أصحى يا نايم وحد الرزاق خليك حويط ..
وإياك يا غشيم تفطر .. صحيح راح تكون عبيط ..
وأصحى يا نايم وحد الدايم من غير شخيط ..

تغريدة صيام

بقلم المبدع / أحمد بيومي